بازگشت به صفحه بیشین

رامین جهانگیر زاده

ایشدیر اگر… 

  ایت اولوب هوره­جم 

  آنجاق هئچ کیمی  

  قاپمایاجام 

  کاروان گلیب کئچه­جک…! 

  پیشیک اولوب، 

  سیچانلارلا اوینایاجام 

  آنجاق یئمه­یه­جم…! 

  ایلان اولوب  

  قورخوزاجام 

  آنجاق قورخمایین 

  چالمایاجام 

  زهریمی ایچیمه داغیداجام…! 

  آت اولوب، 

  کیشنه­یه­جم 

  آنجاق هئچ کیمین اوستوندن  

  کئچمه­یه­جم…! 

  دوه اولوب، 

  قانقاللاری یئیه­جم 

  آنجاق چیچکلری ازمه­یه­جم…! 

  زلی اولوب،  

  موندار قانلاری سوموراجام 

  آنجاق تمیز قانلاری  

  سومورمایاجام…! 

  ایشدیر اگر بونلارین هئچ بیری اولا بیلمه­سم 

  انسان اولوب، 

  قاپاجام…! 

  یئیه­جم…! 

  چالاجام…! 

  آیاقلاییب کئچه­جم…! 

  ازه­جم…! 

  تمیز قانلاری سوموراجام…!