اوشاقلار باغچاسی (۳)

حبیب فرشباف

«کپنک‌»

farshbaaf_5چیچکلرین‌ رنگین‌ یالار کپنک‌،

هر چیچکدن‌ بیر رنگ‌ آلار کپنک‌.

گؤزه‌ل‌ اولار، گویچک‌ اولار کپنک‌،

اؤزوده‌ بیر چیچک‌ اولار کپنک‌.

قانادیندا گیرده‌، گیرده‌ خالی‌وار ،

قاراسی‌ وار، ساریسی‌وار، آلی‌وار.

او هر یئردن‌ باغچا- باغی‌ چوخ سئوه‌ر ،

اوشاقلارلا اویناماغی‌ چوخ‌ سئوه‌ر.

اوچار، اوچار دوز چاتاندا یول‌ اوسته‌

گلیب‌ قونار چیچکلی‌ بیر کول‌ اوسته‌.

قانادلارین‌ گاه‌ اوجالدار، گاه‌ یایار ،

کول‌ اوستونده‌ بیر چیچگه‌ اوخشایار.

بیر اوشاق‌دا اونو گؤروب‌ سئوینر،

گئده‌ر توتسون‌ قلبی‌ گوپ‌- گوپ‌ دؤیونر.

بارماغی‌نین‌ دوز اوجوندان‌ قالخار او ،

اوشاغی‌دا یاندیرار او، یاخار او.

بوردان‌ اورا، اوردان‌ اورا هئی‌ اوچار،

اوشاق‌ اونون‌ دالیسیجا هئی‌ قاچار.

تؤوشر – تؤوشر اَلی‌ اوزاناق‌ قالار ،

دوروب‌ اونون‌ دالیسیجا یالوارار:

گئتمه‌، گئتمه‌ آی‌ قانادلی‌ چیچه‌ییم‌ !

کوسمه‌ مندن‌ منیم‌ گؤزه‌ل‌ گؤیچه‌ییم‌!

قورخورام‌ کی‌ اودو ایشیق‌ ساناسان‌،

گئدیب‌ گیریب‌ اود ایچینده‌ یاناسان‌.

شاملار آغلار سنه‌ تؤکر گؤز یاشی‌،

من‌ ده‌ یاننام‌ شاملار ایله‌ یاناشی‌.

آیاقلارین‌ ایپکدن‌دیر کپنک‌!

قانادلارین‌ چیچکدن‌دیر کپنک‌!

کاش‌ کی‌ سنی‌ بیرجه‌ دفعه‌ توتایدیم‌ ،

گیرده‌، گیرده‌ خال‌ لاریندان‌ اؤپیدیم‌.

یالواریرام‌ یولون‌ دوشسه‌ تبریزه‌

بیر آخشام‌ دا یئنه‌ فوناق‌ گل‌ بیزه‌!

«الیم‌ ایله‌ آیاغیم‌»

بو اَلیم‌دیر، بو آیاغیم‌،

بو گؤزوم‌دور، بو قولاغیم‌.

گؤزلریم‌له‌ من‌ گؤره‌رم‌،

قولاغیم‌لا ائشیدَه‌رم‌.

گؤرسم‌ هاردا شوگالات‌ وار

آیاقلاریم‌ دورماز قاچار.

اللریم‌له‌ سویارام‌ ،

تئز آغزیما قویارام‌.

«قیزیم‌»

قیزیم‌، قیزیم‌، آی‌ قیزیم‌!

اولدوز قیزیم‌، آی‌ قیزیم‌!

آتان‌ ایشدن‌ گلیبدیر

دور گتیر بیر چای‌ قیزیم‌!

«تولکو ایله‌ قارقا»

بیر قارقا اوچا – اوچا

پنیر گوردو بیر پارچا،

قوندو آغزینا آلدی‌،

یئنه‌ده‌ قاناد چالدی‌.

یول‌ اوسته‌کی‌ چینارا

قوندو او آلا قارقا.

چینارین‌ کؤلگه‌سینده‌

چیمنلرین‌ اوستونده‌

بیر تولکو مورگولوردو،

قارقا اونا گولوردو.

تولکو قالخیزدی‌ باشین‌،

قارقایا چاتدی‌ قاشین‌.

سونرا گؤره‌ک‌ نئیله‌ دی‌

او قارقایا سؤیله‌دی‌:

ـ سن‌ نه‌ قشنگ‌سن‌ آ قوش‌ !

سن‌ نه‌ ملک‌سن‌ آ قوش‌!

رنگین‌ نه‌ قَمَری‌ دیر

با خاندا غم‌ اَریدیر!

آیاقلارین‌ اینجه‌دیر ،

اولدوز گؤزلرینجه‌دیر،

سسین‌ نئجه‌دیر گولوم‌

بیر اوخو من‌ده‌ بیلیم‌!

قارقا حیله‌نی‌ دویدو

پنیری‌ یئره‌ قویدو،

دیرناقلاریندا توتدو

اوچو ساینجا اوتدو،

دیمدی‌یین‌ چکدی‌ یئره‌

اوخودو بیردن‌ بیره‌:

عزیزیم‌ حیله‌ کارا

اولمادی‌ حیله‌ کارا

کئچدی‌ پخمه‌ زامانی‌

تولکو گزمه‌ بئکارا !

تولکو اَیری‌ – اَیری‌ باخدی،

‌ گؤزلریندن‌ یاش‌ آخدی‌.

اَله‌ آلماقچون‌ اؤزون‌

تولکو زمزمه‌ ائتدی‌

بؤیوک‌ صابرین‌ سؤزون‌:

«اوندا کی‌ اولاد وطن‌ خام‌ ایدی‌

آخ‌ نئجه‌ کئف‌ چکمه‌لی‌ ایام‌ ایدی‌»

«گونش‌ ایله‌ قار»

قاپیمیزا قار یاغدی‌،

قارین‌ رنگی‌ دوم‌ آغدی‌.

من‌ قاپیدان‌ باخیردیم‌

دوستلاریمی‌ چاغیردیم‌،

بیز اولدوق‌ دسته‌ – دسته‌

زوی‌ – زوی‌ گئتدیق‌ بوز اوسته‌،

قار توپودا اوینادیق‌،

آنجاق‌، حاییف‌ دویمادیق‌.

گونش‌ چیخدی‌ پارلادی‌

قار اریدی‌، قالمادی‌.

«آتام‌ بئکاردیر»

اوندا آتامین‌ ایشی‌ وارایدی‌

منه‌ آلاردی‌ چوخلو اویونجاق‌؛

ایندی‌ بئکاردیر پولو یوخ‌ آنجاق،‌

ایش‌ تاپسا، منه‌ باشماق‌ آلاجاق.‌


بخش: ادبيات | چاپ چاپ | بدون نظر

 


نظریزی یازین / ارسال نظر