“بوگون منه بیر کرمی چال آشیق”

ستار گل محمدی

مین بیر دردیم هاوالانیب سینمده
بوگون منه بیر کرمی چال آشیق
قان آغلاسین اورگیمنن دیده مده
سنده باخیب هر دردیمی بیل آشیق
بوگون منه بیر کرمی چال آشیق
چال یاییلسین بو غم، غصه هر دیله
تک بیر اورک دوزمز بئله نیسگیله
درد بؤیوک دور بم چیخارتماز، چک زیله
قیریلماسین سازینداکی تئل آشیق
بوگون منه بیر کرمی چال آشیق
من کی سنده آرامیرام یاراشیق
بیلدیگینی اسیرگمه چال آشیق
کؤنلوم کیمی دونیام گلیب قاریشیق
وارلیقیما اسیر یامان یئل آشیق
بوگون منه بیر کرمی چال آشیق
بو گون یامان ایتیرمیشم اؤزومو
تاپانمیرام آغزیمداکی سؤزومو
اللریمده گیزلتمیشم اوزومو
سان کی باتیر گؤزلریمه میل آشیق
بوگون منه بیر کرمی چال آشیق
گؤزوم باخا باخا قلبیم اولدو قان
اسیر اولدو ائرمنییه موسلمان
تالاندی جبراییل، یاندی زنگیلان
دونیانین آغزیندا سوسدو دیل آشیق
بوگون منه بیر کرمی چال آشیق
توپ،‌تانگیلا هر طرفی اویدولار
ائل اوبانی یامان گونه قویدولار
وارین یوخون الدن اله سویدولار
کیمسه ده قالمادی دؤولت مال آشیق
بوگون منه بیر کرمی چال آشیق
اوره ییمی یامان آلیب سکسکه
وارلیقیما گؤلگه سالیب تهله که
خبر گؤندر کوراوغلویا،‌بابکه
یامان یئرده تورا دوشوب ائل آشیق
بوگون منه بیر کرمی چال آشیق
بیرده بو دهشتی گؤرمه سین گؤرن
کؤنلومه غم چؤکدو، گؤزلریمه چن
اؤنو آراز کسدی،‌آرخانی دوشمن
نلر اولدو دیلیم اولسون لال آشیق
بوگون منه بیر کرمی چال آشیق
سؤیله خان چوپانا ساخلا ال بیر آز
داها بوندان سونرا آز سارادان یاز
مینلرله سارامی آپاردی آراز
هاممیسی گول یاناق اینجه بئل آشیق
بوگون منه بیر کرمی چال آشیق
آمان آشیق آستا دانیش بیلن وار
جبراییلدان،‌زنگیلاندان گلن وار
بوردا اوغلو، بوردا قیزی اؤلن وار
غم پرده سین، غم اوستونه سال آشیق
بوگون منه بیر کرمی چال آشیق
یانان کؤرپه لرین آهی، ناله سی
قاچان آنالارین بالا وای سسی
موردار دیغالارین اودلو گوللـله سی
صحنه یه وئرمیشدی باشقا حال آشیق
بوگون منه بیر کرمی چال آشیق
سؤیله شمشیر اویان اولدو گؤر نلر
گؤر نه گونه قالدی یوردون کلبجر
روحون مندن اینجیمه سین علسگر
گلنمه دیم اوزاق دوشدو یول آشیق
بوگون منه بیر کرمی چال آشیق
اینانمیرام ساغلیغیما چارام وار
شوشام کیمی داغیلمامیش هارام وار
گؤیجه آدلی بیر ساغالماز یارام وار
تزه لنیر دولاندیقجا ایل آشیق
بوگون منه بیر کرمی چال آشیق

بخش: ادبيات | چاپ چاپ | بدون نظر
 


نظریزی یازین / ارسال نظر