21 آذرین ایل دؤنومو مناسبتی ایله کؤلن شهرینده علمی کنفرانس
دسامبرین 14 اونده، آلمانین کؤلن شهرینده 21 آذر نهضتینین 63 نجی ایل دؤنومو مناسبتی ایله بیر سیمینار تشکیل ائدیلدی. سیمینارین اشتراکچی لاری شهیدلرین احترامینا بیر دقیقه سکوت ائده رک، اجلاسا رسمیت وئردیلر. تدارک کمیته سی نامینه، احمد حسن زاده سیمینارین گئدیشاتی باره ده قیسا معلومات وئردیکدن سونرا، اجلاس ایشه باشلادی. سیرا ایله، نورالدین غروی، سیف الدین حاتم لوئی، ارمولو احمد، سیروس مددی و احمد حسن زاده چیخیش ائتدیلر. امکداشیمیز سیروس مددی نین سئچدیگی موضوع جدی مباحثه لر و دارتیشمالارا سبب اولدو. او دانیشیغیندا، دموکراتیک 21 آذر حرکاتی دوامچیسی آدینا آنتی دموکراتیک سیاست یئریدن سیاسی جریانلار حقینده چیخیش ائتدی و «ملی مبارزه ده» آذربایجانلیلار آراسیندا اورتایا چیخان منفی جهتلری آچیب، کسگین تنقیده دوتدو. بو موضوع اجلاسی تیتره تسه ده، آنجاق اجلاس اشتراکچی لارینین چوخلوغو، بؤیوک تولرانس ایله، مباحثه لردن استقبال ائده رک، دانیشیغی دینله ییب، سئواللار وئردیلر.
اجلاس مباحثه لرین دوام ائتمه سینی اولدوقجا حساس و ضروری حساب ائدیب، خصوصا سیروس مددی نین دانیشیقلاری نتیجه سینده اورتایا چیخان مسئله لری داها آرتیق آیدینلاشدیرماق ایچون یاخین گله جکده سمینارلار قورولماسینی قراره آلدی و یوکسک روحیه ایله ایشینی سونا چاتدیردی. "آذربایجان" سایتی، گلن گونلرده اجلاسداکی دانیشیغلاری، او جمله دن امکداشیمیز "سیروس مددی" نین دانیشیغینین متنینی یایماغا چالیشاجاقدیر.