21 آذر و بو گون

«21 آذر و بو گون» امکداشیمیز سیروس مددی نین 21 آذر مناسبتیله کؤلن شهرینده کئچیریلن مراسیمده کی دانیشیغی نین یازییا کؤچورولموش - رداکته ائدیلمیش متنی دیر. آذربایجاندا ملی دموکراتیک حقوق اوغروندا گئده ن مبارزه نی لنگیده ن جریانلارا- خصوصیله «پان تورکیسم» و «تورانچیلیق» دوشونجه سینه قارشی یؤنه لن بو یازی، شبهه سیز کی گنیش مباحثه لره و مختلف عکس العمل لره سبب اولاجاقدیر. آذربایجان دموکراتلارینین مثبت مناسبتی گؤزله ندیگی کیمی، بعضی تورانچیلارین هیستریک، حتی شخصی عکس العمللری ده گؤزله نیلیر. بیزیم دموکراتیک مبارزه نی لکه لمک قصدی ایله، ان عادی دموکراتیک ایسته گی «پان ترکیسم» آدلاندیران فارس شوونیستلری ده سئوینه رک، بو یازیدان اؤز خیرلرینه استفاده ائتمه گه چالیشاجاقلار. اما بوتون بونلارلا بئله، بو یازی اساس اعتباری ایله آذربایجاندا دموکراتیسم و ملی حقوق اوغروندا گئده ن مبارزه یه خدمت ائده جکدیر. بو حقیقته ایناناراق بو یازینی اوخوجولارا تقدیم ائدیریک.

آذربایجان سایتی بوتون آذربایجان فعاللارینی بو جدی موضوعلار اوزره مباحثه لرده اشتراک ائتمه گه چاغیریر و بوتون موافق و مخالف یازیلاری- متین لیک شرطی ایله- نشر ائتمه گه حاضر اولدوغونو بیلدیریر.

آذربایجان سایتی یازیچیلار هیئتی - آذر 87

www.azer-online.com

(دموکراتیک 21آذر و بو گونکی «ملی» مبارزه ده بعضی آنتی دموکراتیک باخیشلار )

عزیز دوستلار! 21 آذرین، آذربایجان ملی دموکراتیک حکومتی نین 63 – نجی ایل دؤنومو مناسبتیله، منده – مندن اؤنجه دانیشان دوستلار کیمی - سیزی تبریک ائدیب، وطنین، خلقین یولوندا جانلارینی قوربان وئره ن قهرمانلارین خاطره سی اؤنونده باش اگیره م.

سؤزه باشلامادان اول اجازه وئرین بیر موضوعا اشاره ائدیم: تواضعکارلیقدان اوزاق دوشمه سین. منی تانییان دوستلار بیلرلر کی من هئچ زامان یارانان فضایه تابع اولوب، موقعیت، تحسین، کوتله وی آفرینلر و ... دالیسیجا اولمامیشام. کیمسه دن رای توپلاماق فیکرینده ده دگیلم. ایللردیر. هر 21 آذر گلنده من ایسته میشم بیر طرفدن او نهضتدن مدافعه ائده م، بیر طرفدنده بوگونکو مبارزه میزه بیر نظر سالیب، چاتیشمامازلیقلاری، منفی جهتلری اورتایا قویام و اونلارلا مبارزه یوللارینی- دوشوندوگوم قدر- آچیب گؤسترم. ائله بوگونده قصدیم بودور. بیلیرم، هر زامان اولدوغو کیمی مندن اینجییه ن لرده اولاجاق، منله دوشمنلیکه قالخیب، اتهاملار یاغدیرانلاردا. آما حقیقت هر شئیدن اوستوندور. هم حقیقت اولدوغو ایچون، همده خلقیمیزین خیری- منافعی اوندا اولدوغو سببدن.

بیلدیگینیز کیمی 1946-1945 نجی ایللر، آذربایجاندا یارانان ملی دمکراتیک حکومت، ترکیبی، وظیفه لری و اقداماتی نقطه نظریندن شرق و عمومیتله دنیا مقیاسیندا مثلی آز گؤرونن تاریخی حادثه لردن بیری دیر. بیز بوگون بو بؤیوک گونو بیر چوخ اؤزونه مخصوص شرایطده قید ائدیریک. بیر طرفدن ایران اسلام جمهوریتی، فارس افراطی ملیتچیلیگی بیزیم خلقی، بیزیم ملی وارلیغیمیزی ازیب داغیتماقدادیر و بیر طرفدن ده، ملی ظلمه قارشی، اعتراضلار گنیشله نیر و گنیشلندیکجه گونو گوندن آرتیق ساغلاشیب- آنتی دموکراتیک کاراکتر داشییان بیر سیاسی میل ده، دموکراتیک مبارزه میزه باشقا رنگ، باشقا سیما وئریب، اونو اؤز هدفلریندن اوزاقلاشدیرماغا چالیشیر.

21 آذر، بیزه، تاریخ صحیفه لرینده قویلانیب قالان بیر حادثه یوخ، بیر اؤرنه ک دیر: ایللر اوزونو بؤیوک دموکرات پیشه وری نین اساس ایده یالاری، بیر مشعل کیمی اؤنوموزده گئدیب. بیز ایللردیر کی بؤیوک، یورولماز قهرمانلاریمیزین وارثلری کیمی دموکراتیک شعارلارلا، دموکراتیک یوللارلا خلقیمیزین ملی آزادلیق حقوقو اوغروندا دؤیوشموشوک. اوزون ایللر، مبارزلریمیز، بدیعی ادبیاتیمیز، شعریمیز و موسیقیمیزده بو یولو ترنم ائتمیشدیر. بیزیم قوت نقطه لریمیزین بیری ده ائله بو متد و بو یول اولموشدور. بیز دونیا افکار عامه سی ایچینده فقط حقلی ایسته کلریمیز ایله یوخ، همده دموکراتیک یوللارلا دؤیوشدوگوموز ایچین دقت و حمایت قازانمیشیق و قازانا بیله ریک.

اما بیلدیگینیز کیمی، بو گون بیزیم آذربایجاندا بیر آیری متدیک- سیاسی خط ده وار. او خط، «انسان»، «خلق» «وطن»، «آذربایجان» و «ملت سئوه رلیک» یئرینه «قان» «عرق» و «نژاد» سئوه رلیک خطیینی ایره لی سورور. بو جریان بوگون 21آذر آدی آلتیندا گیزلنسه ده، 21 آذرین ایده آللارینا، آرمانلارینا تام قارشی چیخیش ائدیر. بو فوق العاده تهلکه لی جریان، «تورکچولوک- تورانچیلیق» جریانی دیر. تاریخ اثبات ائتمیشدیر کی بو تانینمیش خط، ادعالارینا رغما، تورک خلقلری، تورک ملتلرینین خیرینه یوخ، بیر معین محفل لرین، طبقه لرین و سیاستلرین منافعیندن مدافعه ائتمک ایچون یارانمیشدیر. ساده، صمیمی، خیرخواه، مبارز انسانلاری حقیقی مبارزه دن یاییندیریب، اونلاری انحرافی یوللارا یؤنه لدن «باشچی لار» بو حقیقتی هامیدان یاخشی بیلیرلر.

مختلف انسان قروپلارینین گؤزه ل حیات ایچون بیرگه چالیشماسی اولدوقجا مثبت بیر حرکتدیر. اما «نژادی»، «عرقی» بیرلیک اساسیندا قورولان «اتحاد» لار هر زامان – صداقتلی شخصلرین نیتلریندن آسیلی اولمایاراق- معین سیاستلرین آلت دستینه چئوریلیر. پان امریکانیسم، آمریکا بیرلشمیش دولتلری خیرینه، پان اسلامیزم، پان شیعیزم، پان ایرانیسم تهران منافعینه ، پان اسلاویسمین مسکونون خیرینه اولدوغو کیمی، پان تورکیسم ده عمل میدانیندا ، بیر معین قدرتلی وارلیق، تورک دولتلری ایچینده ان گوجلوسونونه دایانمالی و اوراداکی حاکم دایره لرین منافعینی اؤز منافعیندن اوستون دوتمالی اولور. بو ادعا یوخ، بیر واقعیتدیر. بو یئنی بیر «بین الملل»، «ملی بین الملل»، «ملی انترناسیونال» دیر. متناقض گؤرونن بو مفهوم بیر حقیقت دیر.

سیز بیلیر سیز کی بو میل، بو خط، بیزیم آذربایجاندا یئنی دیر. دوغرو دور، خیابانی دورونده بیر نئچه عثمانلیچی شخصین بو دوشونجه یه طرفدار اولدوغونو بیلیریک. خیابانی نین ده اونلارا مخالف اولدوغوندان خبریمیز وار. اما کئچن 70 ایلده بیزیم فارس شوونیسمینه قارشی، ملی دموکراتیک مبارزه میزده تورکچولوک- تورانچیلیق خطی موجود اولمامیشدیر. . اونون تاریخی 90 نجی ایللردن، آذربایجان جمهوریتینده تورکیه چی ائلچی بیگین حاکمیته گلدیگی دوردن باشلانیر.

ملی دموکراتیک حقوق اوغرونداکی مبارزه ایله، «تورک عرقی»، «تورک قانی»، «تورک دونیاسی» اوغروندا مبارزه ایکی متضاد دوشونجه و سیاست دیر. «آذربایجانچیلیق» لا «تورکچولوک- تورانچیلیق» هرزمان بیر بیری ایله گرگین چکیشمه لرده اولموشلار. و ائله بو سببدن دیر کی آذربایجاندا، تورکیه ده و اوروپادا فعالیت گؤسترن تورکچولوک- تورانچیلیق خطی بیرینجی گوندن بیزیم 21 آذر نهضتی ایله دشمن اولموشدور.

آذربایجان مسئله سی ایله علاقه دار بو گونه کیمی 4 دوشونجه، میل و سیاستین شاهدی اولموشوق:

1- آذربایجان سئوه رلیک Ñ آذربایجانچیلیقÑ2 –آذربایجانچیلیق Ñ بوتون آذربایچانچیلیقÑ 3 –بوتون آذربایجانچیلیق Ñ تورکچولوک 4- تورکچولوک Ñ تورانچیلیق

ملی دموکراتیک حقوقلار، آذربایجان خلقی نین منافعی اوغروندا مبارزه دن باشلانان آذربایجان سئورلیک- آذربایجانچیلیق خطی، بیر آز دقتسیزلیکله، گئتدیکجه، آتدیم آتدیم «تند» له شیر و نهایتده اؤز ضدینه یعنی فوق العاده تهلکه لی پان تورکیسمه، پان تورانیسمه چئوریلیر. بیری بیریندن، چوخ کیچیک المنت لرله- خیردا فرقلرله سئچیلن بو 4 سیاسی میل، نهایتده بیر بیرینه قارشی یوللارا چئوریلیر. بیرینجی یولدا، یعنی آذربایجان سئورلیک- آذربایجانچیلیق دوشونجه سینده اساس و مرکزی نقطه واقع اولان «خلق»، «آذربایجان خلقی» و «دموکراتیسم» ایسه، گئتدیکجه یئرینی «عرق»، «قان» و «نژاد» کیمی آنلاییشلارا وئریر. بو سیاست اؤز گئدیشینده آذربایجاندان اوزاقلاشیر، و یئری گلدیکده آذربایجان علیهینه هئچ دوشمنچیلیگدن ده اسیرگه میر. تورکچو- تورانچیلارین رضاشاهلار، محمد رضا شاهلار، هیتلرلر- موسولینی لرله، امریکا و انگلیس تجاوزکارلاری ایله بیرلشیب، شمالی آذربایجانا و 21 آذره قارشی امکداشلیق ائتدیکلرینی تاریخین صحیفه لریندن سیلمه ک اولماز.

بیلیرسیز کی 21 آذر حرکاتی و ملی حکومت دؤرونده «تورکچو- تورانچیلار» بیزه یوخ، تهران حکومتینه یاردیم ائتمیشلر. ترکیه دولتی او ایللر بیزیم فداییلرین یوخ، سرلشگر زنگنه کیمی جلادلارین پناهگاهینا چئوریلمیشدیر. ترکیه مطبوعاتینین صفحه لری و آنکارا رادیوسونون آرشیولری بو دشمنچیلیک لرین سندلریله دولودور. آنکارا رادیوسو، لندن رادیوسونون قویروغو کیمی نهضته قارشی الیندن گلن افترالاری یایمیش و توطئه لری ائتمیشدیر. ملی حکومت دؤرو مطبوعاتی، آذربایجان روزنامه سینی و شخص پیشه وری نین اثرلریله تانیش اولانلار منیم بو سؤزلریمی یاخشی باشا دوشرلر. پیشه وری دؤنه دؤنه بو خیانتکارانه سیاستی تنقید ائتمیش و اونلارین بیزه نه قدر ضربه لر ووردوغونو قید ائتمیشدیر. بو دؤر تورکیه یه حاکم اولان ارتجاعی دولتین سیاستی، پان تورکیسم سیاستی ایله اوست اوسته دوشموشدور. آیدیندیر کی بیزیم بو سؤزلریمیز- بعضی شیادلارین تبلیغینه رغما، «ترکیه اؤلکه» سینه دشمنلیک دگیل، 21 آذر دؤورو ترکیه ده حکم سوره ن تورک ارتجاعسی و «تورکچو- تورانچیلیق» آدی آلتیندا اوز منافعلرینی تعقیب ائده ن مرتجع رهبرلره قارشی ادعانامه دیر. بلی، بو بیر حقیقتدیر کی، ساده زحمتکش خلقی، عرق اوستونلوگو ایله، آلدادان سیاستچیلر، بو قوه نی آذربایجان نهضتی نین علیهینه تحریک ائتمیشلر.

کئچن گونلرده پان ترکیسمین 21 آذره قارشی سیاستینی تبرئه ائتمه ک ایسته ین بیر شخص «پیشه وری- ترکیه ایلیشکیلری اوزه رینه» آدلی یازیسیندا بو حقیقته اعتراف ائتمیشدیر. او یازیر کی بو دورده تورکیه اؤز قورخوسوندان، اؤز امنیتینی قوروماق ایچین، پیشه وری و 21 آذر ایله دشمنلیک ائتمیشدیر. مقاله نین مؤلفی بونو دئمه کله بیر حقیقتی اورتایا قویور: بلی تورکیه دولتی، دونیا «تورکچولر» ی، و «تورانچیلار»ی اؤز منافعلرینی قورویاراق بیزله دشمنلیک ائتمیشلر. دئمه لی سون سؤزو «سوی»، «قان» و «عرق» یوخ، منافع دئمیش اولور. اگر بئله دیسه پس سؤزو دانیشیلان «ملیت چی لیک» ین، «تورکچولوک» ون معناسی نه دیر. بلی، بیز ائله بو گونده یاشادیغیمیز منطقه ده، «سویداشلیق»، «قانداشلیق» و «دینداشلیق» دان آچیق- آیدین اوستون دوتولدولان منافعین شاهدی ییک. ایران- ارمنستان، ترکیه - ارمنستان مناسبتلری گؤزوموزون اؤنونده دیر.

اؤزه رینده دانیشدیغیمیز 21 آذر حرکاتی دؤورنده ترکیه ارتجاعسینین اساس قورخوسو 21 آذرین دموکراتیک ایده یالاریندان اولموشدور. میلیونلار کند و شهر زحمتکشلرینین حیاتیندا درین دگیشیکلر یارادان، قادینلا کیشینی برابر حقوق اعلان ائده ن، حقوقسوز خلقه شخصیت بخش ائدیب اؤزونه ایناندیران 21 آذر، البته کی منطقه و ائله جه ده تورکیه زحمتکش لرینین اوره ییندن اولموش و منطقه ده حاکم دایره لرینی وحشته سالمیشدیر. اونلارین امنیتینی تهدید ائده ن اساس خطر ائله 21 آذرین دموکراتیک دوشونجه لری اولموشدور. دئمه لی آذربایجان خلقی ایله دشمنچیلیگی تورکیه خلقی یوخ، تورکیه مرتجعلری، تورکیه پان تورکیست رهبرلری ائتمیشلر.

پان ترکیسم فقط محاربه دن سونرا یوخ، محاربه نین ایچینده و اوندان ایللر اونجه دن آذربایجان دموکراتلارینین قانینا سوسامیشدیر. م. ا. رسولزاده نین شکلینی پیشه وری نین شکیلینین یانیندان آسدیرانلار یاخشی بیلیرلر کی رسولزاده او ایللرده عمرونون ان یئتگین چاغلارینی یاشایاراق، بیزیم نهضتین قانلی دشمنلریندن اولموشدور. م.ا. رسولزاده نین بیوگرافیسینی یازاراق، شیادلیقلا 1937 دن 1946 نجی ایللری مسکوت قویوب، رسولزاده حیاتینین او ایللرینی گیزله دن جنابلار یاخشیجا بیلیرلر کی: او ایللرده رسولزاده نه تک بیزیم نهضته طرفدار اولمامیش، بلکه آلمان فاشیسمی ایله- سونرالار ایسه امریکا و انگلیس امپریالیستلری ایله ال اله وئریب بیزه و شمالی آذربایجانا قارشی گرگین فعالیت آپارمیشدیر. بو گیزلدیلمیش قارا پرونده لرین اوزه رینده اطرافلی دانیشماغا بیزیم بو گونکو وقتیمیز امکان وئرمز. ائله او سببدنده من بو موضوعو آیری بیر وقته قویوب آنجاق بو نکته نین اوزه رینده تاکید ائدیره م کی: 21 آذر رهبرلری اوزون ایللردن بری پان تورکیسمین ماهیتینی، اونون بیر معین دایره لرین اللرینده خلقی آلداتماق ایچون بیر وسیله اولدوغونو آنلاییب و نتیجه ده اونا قارشی اولموشلار. و پان تورکیسم ده هئچ زامان دموکراتیک 21 آذرله دوشمنچیلیکدن ال اوزمه میشدیر. آلپ ارسلان تورکشلرین و رسولزاده لرین داوامچیسی اولان قاتی پان تورکیست ائلچی بیگ، حاکمیته کئچدیکدن سونرا، 21 آذردن 45 ایل اؤتسه ده، اؤز اؤندرلرینین یولونو داوام وئریب، 21 آذرله و پیشه وری ایله دشمنچیلیگی دوام ائتدیرمیشدیر.

کئچمیش «شوروی» ده، مسخ ائدیلمیش سوسیالیسم داغیلارکن، او سیستمین یئرینه بیر دموکراتیک رژیم گتیرمک یئرینه، معین دایره لرین- او جمله دن بیر سیرا خارجی آنتی سووه ت و پان ترکیست محافلین- فعالیتی نتیجه سینده، سیاسی بوشلوق محیطینده، ائلچی بیگ دیکه له نیر. اونون حاکمیتی دؤرونده، آذربایجان خلقینه، بؤیوک فاجعوی زیانلار توخونموشدور. همین دؤروده، جنوبی آذربایجان ملی دموکراتیک مبارزه سی و اونون رهبرلری تاپدالانمیش. حتی پیشه وری نین آدی بئله «پیشه وری کوچه سی» ندن سیلینمیشدیر. 21 آذرچیلر جدی سیخینتیلارا، هده لنمه کلره معروض قالمیشلار.

بلی عزیز دوستلار! ساده وطن سئور تورکلری آلدادیب، اونلاری دموکراتیک مبارزه دن یاییندیریب، ملت سئورلیک پرده سی آلتیندا عرقچی لیکه و نهایت اؤز منافعلرینه تابع ائتمک ایسته ین پان تورکیست رهبرلر، ایللر اؤتدوکدن سونرا بیزیم آذربایجاندا 2موضووعا متوجه اولموشلار:

- اؤزلرینین بیزیم آذربایجان مبارزه تاریخینده سابقه سیز اولدوقلارینی

سون ایللرده بو ایکی نکته نی باشا دوشن «تورکچو- تورانچیلار» بیزیم مبارزه تاریخیمیزی تحریف ائدیب، اونو اؤز خیرلرینه «مصادره» ائتمه گه، منیمسه مه گه چالیشیرلار. اونون ایده یا - دوشونجه لرینی تحریف ائتمک، اونا یالان تاریخ یازماق تورانچیلارین پلانینا کئچمیشدیر. تاریخ عرصه سینده جمیل حسنلی بونا بویوک نمونه دیر. ائلچی بیگین یاخین یاردیمچیلاریندان اولان بو شخص، اؤنجه، آذربایجان نهضتینی بیرینجی گونوندن سون گونونه قدر استالینین قورغوسو قلمه وئریر، 21 آذری قوندارما حرکت کیمی جلوه لندیریر و سونرالار، محیطین اقتضاسی ایله اوردا بوردا کتابینین پیس باشا دوشولدوگونو، فارس دیلینه پیس ترجمه اولوندوغونو سویله ییر. «وودرو ویلسون» سویوق محاربه تاریخی موسسه لرینین امکداشلیغی و «آفرین» لری ایله یازیب یارادان بو شخص، سون زامانلار بیر سیرا ساده لوح شخصلرین اوره گینی اله آلماق ایچون، اوردا بوردا پیشه وری نین ملی شخص اولدوغوندان دا دانیشیر!. بیزیم آذربایجانا و اونون تاریخینه محمود افشارلار، کسروی لر قدر ضرر ووران، ائلچی بیگچی بو تاریخچی یاردیمچیسی اؤز یازیلاری ایچون فارس شوونیسمی و غربده کی سویوق محاربه رهبرلرینین سئوگیلیسینه چئوریلمیشدیر. اونون یازیلاری ایندی «ورق زر» کیمی اللرده گزیر. او ایران مرتجعلرینین، فارس شوونیستلرینین زهرلی تدقیقات و تبلیغاتلاری ایچون 100 ایللیک ماتریال بخش ائتمیشدیر . بیزیم نهضتین قوندارما، چمداندا گؤندریلن دستور نتیجه سینده یارانان حرکت کیمی گؤسترمک ایسته ین لر، ایندی بوگون آیری دونا بورونوب، بیزیم صادق انسانلاریمیزی، صادق آذربایجان سئورلریمیزی، صادق فداییلر بالالارینی آذربایجاندان اوزاقلاشدیریب اونون ملی هویتینی تورکچولوک ایچینده ازیب محو ائتمه گه چالیشیرلار. اونو مشخص آذربایجان ایچون دموکراتیک مبارزه دن یاییندیریب، مجرد «توران» ایچون- آنتی دموکراتیک یوللارلا، قان و عرق مبارزه سینه چاغیریرلار.

تورک دیللر عائله سیندن اولان بیزیم آذربایجان دیلی، تورک دیللرینین بیر شعبه سینین بیر شاخه سی دیر. بو دانیلماز بیر واقعیت دیر. اما تورک دیللی خلقلرین، تورک ملتلرینین مختلف جغرافیالاردا یاشادیغی، (سیبریدن دوتموش، اروپا و چینه قدر) مختلف دینلره ایناندیغی، مختلف گؤرکملرده اولدوغو و اقتصادی باخیمدان فرقلی اقتصادلاردا یاشادیغی دا هامیمیزا آیدیندیر. اونلارین دانیشدیغی دیللر آراسیندا کی فرق و ایفا طرزی او قدر دیرکی بوگون هر بیرینین دیلی اؤز آدی ایله مشخص ائدیلیر. بیزیم دیلیمیز آذربایجان تورکجه سی (آذربایجان دیلی) دیر. اونون اؤزونه مخصوص سؤز خزینه سی و ایفا طرزی وار. سون زامانلار چین تورکلری ایله آذربایجان تورکلرینین تاریخی سیاسی جغرافیایی فرقلرینی گیزله دیب ، هامینی تورک آدی ایله تانیدانلار، بیزیم ملی وارلیغیمیزی، آذربایجان هویتیمیزی محو ائدیب، موهوم و نامعلوم تورکه چئویرنلر، دیلیمیزی ده اریدیب آرادان آپاریرلار. اونلارین سیاستی بو عرصه ده ده فارس شوونیسمی سیاستی ایله اوست اوسته دوشور.

بیلیرسیز کی شاهلیق دوری حتی «آذربایجان» سؤزو، آذربایجان آدی، اؤزو اؤزلوگونده بیر نوع تهلکه لی سؤز حساب ائدیلیردی. رضاشاه دوروندن پهلوی لرین سون گونونه قدر «آذربایجان» آدیندا روزنامه نین نشرینه اجازه ویریلمه دی. 21 آذرین مغلوبیتیندن سونرا تهران ارتجاعسی و فارس افراطی ملیتچیلری حتی بیزیم استانلارین آدلارینی دا دگیشمک ایسته میشلر. تهران بیزیم آذربایجانی نئجه پارچایا بؤلوب، «استان سوم»، «استان جهارم» و ... آدلاندیرماقلا، اونو حتی آدینی بئله کتابلاردان سیلمه ک ایسته میشدیر. فارس شوونیسمی بو آدی تحمل ائده بیلمه دیگی کیمی، تورکچولوک- تورانچیلیقدا دا «آذربایجان» آدی، آذربایجان هویتی دؤزولمز حساب اولونور.

کئچن 15- 10 ایللین ایچینده بیر معین سیاست اجرا ائدیلیر: آذربایجان هویتی یوخ، تورک هویتیندن دانیشیلیر. «تورانین بیر ائلی وار، بیر دیلی وار» باغیران «بیگ» لر و «بایان» لار «آذربایجان» دان سؤز آچماغی، آذربایجانچیلیغی باغیشلانماز گناه و «کفر» سانیرلار. کسروی نین اختراع ائتدیگی «آذری» سؤزو ایله مخالفت بهانه سیله، مترقی آذربایجان سئوه رلیک ادبیاتیمیزدا «آذربایجانلی» معناسیندا ایشله نن «آذری» سؤزو، و هابئله «آذربایجان تورکجه سی» معناسیندا اولان «آذری تورکجه سی» سیخیشدیریلیب، میداندان چیخاریلمیشدیر. دئمه لی آذربایجانا شخصیت وئره ن هر هانسی المنت وارسا، اونونلا دشمنچیلیق ائدیلیر. دونن سؤز آچدیقلاری «آذربایجان مرکزلی دوشونجه»، بوگون «تورکچولوگه» گلیب چاتمیشدیر.

دیل بیر ملتین ملی وارلیغینین اساس تملی دیر. او سببدن بیزیم آذربایجان دیلی (آذربایجان تورکجه سی) فارس شوونیستلری طرفیندن تاپداندیغی کیمی، بیرده یئنی میدانه گلن تورکچو- تورانچی جنابلارین الیله ازیلیر. اونو «تورکله شدیرمگه» چالیشدیقدا، سؤزلر دگیشدیریلیر، «استانبوللاشدیریلیر». سون زامانلاردا یاییلان یازیلارا، ایشله دیلن سؤزلره دقت ائتدیکده، بو فاجعه نین شاهدی اولوروق. بو سیاست خلقیمیزه اؤز دیلینده یازیب اوخوماق اؤیره تمه کین قارشیسیندا فوق العاده بؤیوک بیر مانع یاراتمادادیر.

آذربایجان ملی وارلیغی- آذربایجان دیلی ایله علاقه ده، ایکی باخیش و سیاستی بیر بیری ایله مقایسه ائدین. بیر طرفدن «انسانلاری» و «خلقی» مرکز دوتان پیشه وریلرین و بیر طرفدن مختلف دونا بورونموش «تورکچو» ، «تورانچی»، عرقچیلرین سیاست و باخیشلارین. شانلی 21 آذرین پارلاق تاریخی صحیفه لریندن بیریده ائله ملی وارلیق و دیلیمیزه مناسبتی اولموشدور.

21 آذرین رهبرلری انسانلارین بیرلیگینی ایسته دیگی حالدا، یاخشی بیلیردیلر کی «تورکچولوک» تورکلرین بیرلیگی فلسفه سی یوخ، عملده معین دایره لرین منافعینه اؤرتوک اولان بیر فلسفه دیر. بیلیرسیز کی تورکیه ده تورکچولوک گوجله نن زامان، ایراندا دا فارس شوونیسمی قدرتله نمه ده اولموشدور. ترکیه ده، اروپادا و هابئله شمالی آذربایجاندان گلیب ایراندا یاشایان پان تورکیستلر و مساواتچیلار فارس شوونیسمی نین، رضا شاهین غدار تبلیغاتچیلاری اولموشلار. اونلار آذربایجان قانینا سوسامیش رضاشاهی، آنتی کمونیست- آنتی سووه ت اولدوغو ایچون تائید و اونا یاردیم ائتمیشلر. رسولزاده نین دؤنه دؤنه رضاشاهی مدح ائتدیگیندن خبریمیز وار. اونون «کنگره» فردوسی- فردوسی نین 1000 ایللیگی- مناسبتی ایله یازدیقلاری دانیلماز تاریخی سندلر دیر. . [م. ا. رسولزاده حقینده منیم یاخین گله جکده نشر ائده جگیم یازی یا منتظر قالا بیلمه ین دوستلاری، هله لیک، کیجیک نمونه اولاراق «شمالی قافقاز» ژورنالی نین 1934 نجی ایل 5-6 نجی نمره لرینده (صص 2-3) کی «فردوسی بایرامی» آدلی مقاله یه باخماقا دعوت ائدیرم.]

اما بیز بوگون بیر عجیب تاریخی تقلبون شاهدی ییک. دوننه کیمی پیشه وری یه لعنتلر اوخویان «بوزقورد» چیلار، بوگون اونو دا مصادره ائدیرلر. بؤیوک دموکرات و آنتی راسیست اولان پیشه وری نین عکسی رسولزاده ایله، «بؤزقورد» لا بیر یئرده یاییلیر. 21 آذرده «قورد» اولاماسی تشکیل ائدیلیر. بو فقط شکل دگیل. پان تورکیسم بیزیم نهضتی ملی دموکراتیک مضموندان بوشالدیب، اونو محو ائتمک ایچون جدی حرکته کئچمیشدیر.

سون زامانلار بیزیم آذربایجاندا ملی ظلمه قارشی عصیان ائدنلرین بؤیوک بیر حصه سی،«من تورکم» دئیه، آذربایجان منافعی ایچون عصیان ائدیرلر. اونلار آرا سیرا اؤزلرینی «تورکچو» آدلاندیرسالاردا، اونو بام باشقا معنادا، «ملی حقوق، ملی وارلیق اوغروندا مبارزه» شعاری کیمی آنلاییب استفاده ائدیرلر. ملی ظلمدن جانه گلمیش بو مبارز انسانلارین انسانی حسیاتیندان سو استفاده ائدیب، اونلاری «پان تورکیست، تورانچی» کیمی قلمه وئره نلر، اؤز ایشلرینین معناسینی یاخشیجا بیلیرلر. اونلار تاریخیمیزی مصادره ائتدیکلری کیمی، مبارزلریمیزی ده مصادره ائتمه گه جهد گؤستریرلر.

تاریخ بیر ملتین بیر خلقین سرگذشتی دیر. اونو اولدوغو کیمی تانیتماق، تحلیل ائتمک گرک. اونو بو گونکو قالیبا سالماق اولماز. اونو بو گون ایسته دیگیمیز شکله سالماق، هم یالان، همده خلقی تاریخی درسدن، تاریخی تجربه دن محروم ائتمک دئمه کدیر.

بیزیم ملی دموکراتیک 21 آذر حرکتی، افراطی ملت پرستلیک حرکتی اولمامیشدیر. بیزیم 21 آذر حکومتی دموکراتیک و خلق حکومتی اولوب. اونون آدینداکی «ملی حکومت» سؤزو ناسیونالیست لیک، ملیت پرست لیک یوخ، آذربایجان خلقی ایچون و آذربایجان ملتی ایچون اولماق دئمک دیر. بیلیرسیز کی ملی سؤزو آذربایجاندا و ایراندا، او ایللر و حتی بو گونه کیمی «خلقی»، «غیر دولتی»، «دولته قارشی»، «عمومی» و ... معنادا ایشله نیب. 21 آذرین یاراتدیغی حکومتین «ملی» آدلانماسی، اونون «خلقی» اولماسی دئمکدیر. فرقه باشچیلاری و شخص پیشه وری هر زمان بوتون ایراندا «ملی حکومت» یاراتماق قصدلریندن دانیشمیشدیلار. اونلار دیمیشدیلر کی: آذربایجاندا یارانان ملی حکومت بیزیم سرحدلرده محدود قالمامالی! بیزیم مقصدیمیز بوتون ایراندا ملی حکومت یاراتماقدیر. بیزیم رهبرلر اؤزلرینی دموکراتلار آدلاندیرمیشلار. فرقه نین ده آدی «دموکرات فرقه سی» اولموشدور. اونلار هئچ زامان «نه موتلو تورکوم دئییه ن» دئمه ییب، دوشونمه میشلر. پیشه وری عثمانلی امپریاسینین داغیلما سببلریندن دانیشاندا ائله بو تورکچولوگون رولونو تنقید ائتمیشدیر. قوندارما 21 آذرچیلر یوخ، 21 آذر آدی آلتیندا «توران» بؤیورنلر یوخ، حقیقی 21 آذرچیلر ملتیمیزی خلقیمیزی سئومیش و هیچ زامان عرق دن و نژاد دان دانیشمامیشلار.

بیزیم تورکچو و ملیتچیلرین فیکرینه مغایر اولاراق، 21 آذر حرکاتی هئچ زامان آذربایجانلیلاری آذربایجانلی اولدوقلاری ایچون مقدس لشدیرمه میشدیر. ملی حکومت ملتین معین حصه سی، ملتین ایچینده کی بیر آیری ملتی تشکیل ائدن زحمتکشلر، روشنفکرلر و آذربایجان خلقینه منافع یتیرنلرین حسابینی، آذربایجانلی خانلارین، اعیانلارین، دولت باشچیلارینین حسابیندان آییرمیش، اونلارین آراسیندا جدی فرق قویموشلار. بیلیرسیز کی او دورده بیزه قارشی مبارزه آپارانلارین چوخ بؤیوک بیر حصه سی ائله آذربایجانلیلار اولموشلار. سید حسن تقی زاده، ساعد، شاه بختی، ذوالفقاری، امیر نصرت اسکندری و مینلر باشقاسی نین آذربایجانلی اولدوغونا شبهه ائده ن یوخدور. شریعتمداری و تهراندا معرکه گزدیرن میرزه حسین واعظ ده آذربایجانلی اولموشلار. اما فرقه، زحمتکش آذربایجان ملتینه قارشی اولان، «تورک» خانلاری و «تورک» ساتقینلارینی «خلق دشمنی» اعلان ائدیب. اونلار بیزی و بیز اونلاری محو ائتمگه چالیشمیشیق. بوگون ملاحسنی لری، هادی غفاریلری، آذربایجانلی اولدوقلاری ایجون بیزیم و بیزه متحد حساب ائدنلر، هر نه دن دانیشسالاردا، اؤزلرینی 21 آذر حرکاتی داوامچیلاری جلوه لندیرمه گه حقلری یوخدور.

21 آذر سکولار بیر حرکتدیر. بیزیم رهبرلر خلقین دینی اعتقادلارینا حرمت قویسالاردا، هئج زامان دینی سیاسته قاتانلارلا باریشمامیشلار. بو ائله مشروطه دؤروندن بیزده بیر سنت دیر . ستارخاندا بئله اولموشدور، شیخ محمد و پیشه وری ده. بیزیم نهضتی قان دریاسیندا بوغانلار دیندن سوء استفاده ائتمکله ایره لی گلمیشلر. بیز خلقین دینی اعتقادلارینا جدا احترام قویمالی ییق. دین له سیاستین آیریلماسی و ایری قالماسیندان حرکت ائتمه لی ییک. بنائا دینی دولت یاراتماق ایسته ین لرله 21 آذرین هیج باغلیلیغی اولا بیلمز. تورک دیلینی یایماق ایچون، خمینی اثرلرینی بیزیم دیله ترجمه ائدیب سحره کیمی تاثردن آغلایان حضرات هر نه دن ده دانیشسالار، اؤزلرینی 21 آذره باغلاماغا حقلری یوخدور.

21 آذر حرکاتی دنیا امپریالیستلرینین قورقوسو ایله داغیلیب، قان دریاسیندا محو ائدیلمیشدیر. بوگون آمریکا دولتینه، اونون دنیا سیاستلرینه هر کیمین هر نظری وارسا، اونون اؤزونه محترم دیر. بیز، کیمسه نی نظرلرینی دگیشمه گه مجبور ائتمه ک ایسته میریک و حقیمیزده یوخدور. اما دوننه کیمی، آنتی امپریالیست لیکده اؤزلریندن آلوولوسون تانیمایان، ایندی اؤزلرینی الده قاییرما تشکیلاتلار لیدری آدلاندیران پهلوان پنبه لرین ده، بعضی محفل لره سیغیناراق 21 آذری تحریف ائتمه گه حقلرینی یوخدور! قوی 21 آذرین دوشمنلرینه یالتاقلیقی 21 آذر آدی التیندا یوخ، باشقا بیر آد آلتیندا حیاته کئچیرسینلر. بو تاریخ دیر و اونو هر گونکو سیاستین اقتضاسی ایچون تحریف ائتمک اولماز. توران بؤیوروب، عرقچیلیک تبلیغ ائتمه گله، 21 آذر یولونون دوامچیلیغی – عربلر دئمیشکن- «مانعة الجمع» یوللار و دوشونجه لر دیر.

مختلف دولتلرین یاراتدیغی بودجه لرله، اوزدن ایراق ملی مبارزه آپارماق ادعاسیندا اولان، امریکانین بیر سنات نماینده سی ایله بیر خیاواندا یان با یان کئچدیکلرینی بؤیوک فخر حساب ائدنلرین 21 آذرله هیچ علاقه سی اولا بیلمز. امریکا پرزیدنت لیک سئچکی لرینده دسته باغلاییب سویوق محاریبه قهرمانی، افراطی «مک کین» ینین سئچیلمه سینه چالیشان، اوباما سئچیلدیکدن سونرا، شوونیست شاهپرستلریمیزله بیرلیکده «تعزیه» دوتانلارلا بیزیم- حقیقی 21 آذرچیلرین- هیچ بیر باغلانتیسی یوخدور. فارس و کورد افراطی ملیتچیلری کیمی، امریکا و انگلیس حاکم جنگ طلب دایره لرینه، «ایرانا حمله ائت، سن گویدن بیز یئردن!» دئین بیگلر اؤز ایشلرینده آزاد دیرلار. اما بیز اونلارا اؤزلرینی 21 آذره باغلاماق اجازه سینی وئره بیلمه ریک.

بو گون بو آجی سوزلریمین داوامیندا، 21 آذر مناسبتی ایله، یئری گلمیشکن بیر ایکی باشقا نکته یه ده اشاره ائتمک ایسته ردیم. او نکته لر کورد، ارمنی و فارس مسئله سیدیر.

ارمنی مسئله سی بو دورده بیزه شمالی آذربایجان واسطه سیله داخل ائدیلمیشدیر. بیز ایراندا یاشایان ارمنی خلقی ایله قارداشواری یاشاییریق. بو خلق 21 آذر حرکاتیندا باش و جانلا شرکت ائدیب، آذربایجان نامینه بؤیوک قوربانلار وئرمیشدیر. آرسن شاخیان، سورن هارونیان و هارتون هایرانیان کیمی ارمنی فرقه چیلری و ارمنی فدائیلرینین قانی باشقالاریله بیرلیکده، آذربایجانین توپراقلارینا آخیدیلمیشدیر. بیز بوگونده اونلارلا قارداشلیغیمیزی قورومالی ییق. بیز عثمانلی و مساوات حکومتلری نین وارثلری کیمی یوخ، پیشه وریلر ائولادی کیمی، 21 آذر متدی ایله ارمنی مسئله سینه یاناشمالی ییق.

شمالی آذربایجاندا، قاراباغدا ارمنی داشناکلاری رهبرلیگی ایله یارانان جنایتلری اؤرتوب باسدیرماق اولماز. اما او انسانی فاجعه لری یارادانلارین بیر طرفی روسیه نین و بیر سیرا خارجی اؤلکه لرین مرتجع حاکم دایره لری اولسادا، داخلی مقصرلرین رولونو دا اونوتماق ممکن دگیل. دوغرودور! بو فاجعه لرین یارانماسیندا اساس مسئولیت، آذربایجان توپراقلارینا باسقینا کئچن، اشغال ائدیلمیش یئرلرده «نسل کسمه» سیاسی یئریدن تجاوزکار ارمنی ملیتچیلری نین - «هایستان» خولیاچیلاری نین بوینونا دیر. اما فاجعه نین گلیشمه سی و گنیش لنمه سینده «تورکچولوک» سلاحی ایله سیاست میدانینا چیخان، «توران» خولیالی ائلچی بیگ حاکمیتی نین ده رولونو انکار ائتمک اولماز. دئمه لی بو ایکی اکسترمیست پارتیا بیر بیرینی تکمیل لشدیرمیش دیر. ایکی ملتین ساده زحمتکش انسانلارینین ضررینه قورتاران بو ماجرانین داخلی عامللری قدرتدن اندیریلمه لی ایدی و اندیریلمه لیدی. خوشبختانه آذربایجان خلقینین ضررینه قورتاران بو فاجعه لری یارادانلاردان بیر طرفی، یعنی قاتی تورکیه پرست، قاتی پان تورکیست ائلچی بیگچیلر قدرتدن سالینمیش دیر. اما تاسفلرله ارمنستاندا داشناکلار، تجاوزکارلار حاکمیتی هله ده دوام دیر. تکجه قارداش آذربایجان خلقینه یوخ، ارمنی خلقینین اؤزونه جبران ائدیلمز فاجعه لر ارمغان ائدن بو مرتجع اولترا ملیت پرستلر – باشقا سؤزله- ایرواندا حکم سوره ن داشناکلاری دا تختدن سالینمالیدیرلار.

آذربایجان جمهوریتینده کی «ارمنی- مسلمان» مسئله سینی عرقی دشمنلیک تبلیغ ایتمکله، حل ائتمک اولماز. جنوبی آذربایجان آزادیخواهلاری بو مسئله ده افراطی موضعدن مطلقا اوزاق گزمه لیدیرلر. ارمنی داشناکلاریله، ساده ارمنی خلقی آراسیندا، «هایستان» چیلارلا، هایستانچی جانیلرین قوربانی اولان خلقه فرق قویمایانلار 21 آذردن دانیشا بیلمزلر. گئدین پیشه وری نین قافقازدا ارمنی مسلمان داعواسی حقینده یازدیقلارینا، «رسولزاده کومپانیه سی» و داشناک هایستانچیلارینا قارشی یازیلارینا باخین. بودور دموکراتلارین متد و موضع حرکتلری و 21 آذری اؤزلرینه تاریخ سانانلار آنجاق بو یوللا حرکت ائتمه لی دیرلر.

عزیز دوستلار! بیلدیگینیز کیمی بیزیم اساس مسئله لریمیزدن بیری ده کورد مسئله سیدیر. بو یولدا دا 21 آذردن آلینمالی درسلر آز دگیل. سون ایللرده کورد افراطی ملتچیلیگی داها شدتلنمیشدیر. بو فوق العاده تهلکه لی خسته لیک، اکثر کورد تشکیلاتلارینی بورویوب، مسموم ائتمیشدیر. تورکیه دولتی ده اوز کورد مسئله سینی بیزه صادر ائتمکله، اوزونه «پشت جبهه» یاراتمیش، و بیزی جدی پروبلملر قارشیسیندا قویموشدور. کورد ملتی بیزیم قونشوموزدور. بیز یئرمیزی دگیشه بیلمه ریک، کورد ملتینین ده یئرینی دگیشمک اولماز. دئمه لی بیز بیر بیریمیزین یانیندا یاشاماغا مجبوروق. آذربایجان دموکراتلاری کورد اولترا ملیتچیلریله مبارزه ائتدیگی حالدا، کورد خلقی نین ده ملی - دموکراتیک حقوقلاریندان دفاع ائتمه لی دیر. «کوردلره» قارشی اسلامی ایران جمهوریتی ایله بیرلشنلر، پاسدارلارلا کورد پیشمرگه لرینین داعواسیندا، پاسدارلاری اؤزوموزدن سایانلار، اؤزلرینی 21 آذره، آذربایجان دموکراتلارینا باغلاماغا حقلری یوخدور. مرتجعلرین و اولترا ناسیونالیستلرین اللریله منطقه ده یارانان وضعیت، ایکی قونشو، ایکی قارداش ملت آراسیندا بؤیوک قانلی سناریولار حاضیرلاماقدادیر. بیز حقیقی کورد آزادیخواهلارینی، کورد ملتینی باشا سالمالی ییق کی، افراطی کوردپرستلرین یاراتدیغی سیاستلر اونلارا قان و جنایتدن باشقا بیر شئی ارمغان ائتمز. بیز کورد ملتی ایله دیل تاپماقدا بویوک امکانلارا مالک ایک. قوی تورکیه دولتی اوز سیاستینی بیزه اکسپورت ائتمه سین. بیز قونشولریمیزلا دیل تاپماغی بیرینجی سیرادا قویوب، کوردلرله عرق و نژاد دعواسینا مطلقا گیرمه مه لی ییک. ملی حقوق اوغروندا اوزون ایللر چیین چییینه مبارزه آپاران ایکی ملتین دموکراتلاری، بو زمینه ده ده بؤیوک تاریخی تجربه لره مالکدیرلر. پیشه وری- قاضی محمد مناسبتلری، بؤیوک تاریخی سند و تجربه قایناغی کیمی هله ده بیزیم اؤنوموزده دیر.

قوی کورد اولترا ملیتچیلری ایله کورد ملتی آراسیندا فرق قویمایان شخصلر، اؤزلرینی بوزقوردلارین ائولادی آدلاندیرسینلار. اما اونلارین 21 آذره آرخالانماغا، اؤزلرینی 21 آذر داوامچیسی آدلاندیرماغا حقلری یوخدور.

بوگونکو اساس مسئله لریمیزدن بیری ده، بیزی چین و یا سیبری تورکلریندن داها آرتیق ماراقلاندیران فارس ملتی مسئله سیدیر. فارس ملتی بیزیم قونشوموزدور. چین تورکلری مین ایللر چینلی لرله بیرگه یاشاییب بیر بیرینه تاثیر قویموشسا، سیبری تورکلری روسلارلا متقابل علاقه ده اولموشسالار، بیزده قونشولوغوموزدا یاشایان فارس ملتی ایله بیر یئرده یاشامیشیق و یاشاماغا مجبوروق. کئچن قرن ایچینده او ملتین نماینده لری کیمی چیخیش ائدنلر، او ملتین ضییالیلارینین بؤیوک اکثریتی فارس شوونیسمی سلاحی ایله بیزیم ملی وارلیغیمیزی ازیب محو ائتمه گه چالیشمیشدیر. بو بیر آجی حقیقتدیر. من هر زامان دئمیشم : بو وضعیتدن چیخماغین یولی شوونیسم موضعیندن حرکت ائتمک و فارس شوونیستلری نین ایشلتدیگی شوونیسم سلاحی دگیل. بلی فارس شوونیسمینین بیزه ائتدیگی جنایتلرین تاثیری آلتیندا بیزیم جوانلار ایچینده بیر معین قدر «آنتی فارسلیق» قابل فهمدیر. آما ارمنی داشناکلارینا گوره، ارمنی ملتینه ، پ.ک.ک و پژاکا گوره کورد ملتینه ، فارس شوونیسمینه گوره ده قونشو فارس ملتینه دوشمن اولماق اولماز. دموکراتیک یوللارلا فارس راسیسمینه قارشی مبارزه یئرینه، قان دعواسی و نژادی مجادله یاراتماق بیزیم مبارزه نی مطلق شکسته اوغرادار. 21 آذر بو باخیمداندا بؤیوک مکتب دیر. بیز آذربایجانلی ییق. دیلیمیزه، ملی وارلیغیمیزا، اؤلکه میزه خور باخان گؤزلری چیخارتماغا حاضر اولمالی ییق. آما عرق، نژاد، قان دعواسی یاراتماغا یوخ.

ایندی بیزیم اورتامیزدا اؤزونو 21 آذره باغلایانلارا راست گلینیر کی مبارزه نی دینی حاکمیته، فارس شوونیسمینه قارشی یوخ، فارسلارا قارشی حساب ائدیرلر. اونلار یا بیلمیر و یا دا یاخشی بیلیر کی بوگون ایرانا حاکم اولان اسلامی رژیمین ایدئولوژیک اساسلاریندان بیری دا فارس شوونیسمی دی. اؤزونو اسلامی آدلاندیریب دینی انترناسیونال ادعاسیندا اولان رژیم، فارس شوونیسمینین ان عالی تجسمو، دولتلشمیش فورمو دور.

دموکراتیزم ایجون حاکم رژیمله مبارزه ائتمه ین لر، فارس شوونیسمی نین ان عالی تبلورو اولان اسلامی رژیمه یوخ، فارسلارا قارشی مبارزه اعلان ائدن شخص لر، یا فوق العاده ساده لوح، یا مغرض و یا ایران رژیمینین بیزیم ایچیمیزده کی مامورلاری دیرلار. 21 آذر مکتبینین وئردیگی درسلر بونلاردیر.

گله جه گین نه اولاجاغینی ایندیدن تام دقتله دئمه ک اولماز. اما بیز بوگون- ایستر ایسته مز- ایران ترکیبینده یاشاییریق و او اؤلکه نی یارادان سایجا ایکی بؤیوک ملتین بیری ییک. هم ایندیکی طالعیمیز، همده ملی وارلیغیمیز نامینه ایرانین هیج بیر سیاسی اقتصادی و اجتماعی پروسسینه لاقید قالماغا حقیمیز یوخدور. «ایران» سؤزونو تابو ائدنلر، «ایران آدلانان اؤلکه نی» رسمیتله تانیمایانلار، بؤیوک داش گؤتوروب آتا بیلمه ین لر، ایندیدن استقلال آلیب بیر باشا شمالی آذربایجانا قووشماق و یا تورکیه ایله بیرلشمک ایسته ینلر، اؤزونو 21 آذرتشکیلاتی لیدری آدلاندیران تورانچیلار، بیزیم مبارزه میزین ایره لی له مه سینه یوخ، لنگیمه سینه خدمت ائدیرلر. بودور 21 آذرین بیر باشقا بؤیوک درسی.

آذربایجاندا ملی حقوق اوغروندا مبارزه بوگون چوخ تهلکه لی بیر دور کئچیردیر. من ایللردیر دئدیگیم سؤزو یئنه تکرار ائدیرم: تهلکه لی سیاستلرین مجری لری ایله «همه با هم» شعاری و بایراقی آلتیدا ایره لی له مک ممکن دگیل. آیدین ـ آچیق سیاستلرله ایره لی له مک لازمدیر. بیزیم نهضتین ایچیندن ایکی متضاد، بؤیوک قاناد آیریلیب، فورمالاشاجاق. بو ایکی قاناد، فدرالیسم و استقلال طرفدارلاری دگیل. بو قانادلار:

- آذربایجان ملی حقوق مبارزلری، آذربایجان دموکراتلاری

- و ساغچی افراطی ناسیونالیستلر، تورانچی بوزقوردچیلاردیرلار.

تورکیه نین اؤزونده فوق العاده آزینلیقدا قالان بو افراطی تورانچیلار، بوزقوردچیلار تورک ملتی نین، تورک دموکراتلاری نین مثبت حسلرینی یوخ، بلکه نفرتینی قازانمیشلار. اونلارین آذربایجان جمهوریتینه قارشی فعالیتلریندن، بو جمهوریتی «آذربایجانلاشدیرما» یوخ، «تورکیه لشدیرمه» جهدلریندن ده خبریمیز واردیر. همین بو خط بوگون بیزیم آذربایجاندا مختلف واسطه لرله بؤیوک قدرتلر- مؤسسه لر طرفیندن حمایه اولونور. بو قدرتلر و بو موسسه لری دولاندیرانلار بیزیم گونو گوندن آرتیق مبارزه یه قوشولان جوان نسلی اوز طرفلرینه چکمه گه چالیشیرلار. اونلارین چالیشمالاری حتی بعضی دموکراتلاریمیزین دوشونجه و اثرلرینه بئله تاثیر ائتمیش و منفی ایزلر بوراخمیشدیر. حتی بیر سیرا دموکرات شخصلرین دانیشیقلاریندا بو تهلکه لی خطین ایزلرینی بئله گؤروروک. آذربایجاندا ملی دموکراتیک حقوق اوغروندا مبارزه نین گله جه گی، بوگون یارانان، فورمالاشان بو ایکی قانادین، ایکی دوشونجه نین کشاکشیندن آسیلی اولاجاق. آییق و ساییق اولمالی و جوان مبارزلریمیزی عرقچیلیره قارشی، ستارخان لار، خیابانی لر، پیشه وری لر یولو ایله مبارزه یه سفربر ائتمک گره کدیر. آذربایجاندا «باش بوغچو» لاری، «اولکوجو» لری، «تورانچی» لاری سیاسی انزوایه سالیب، آتا بابالاریمیزدان مثبت ارث قالان دموکراتیسم ایله آذربایجانیمیزین ملی وارلیغی اوغروندا، خلقیمیزین سعادتی یولوندا، ارتجاع و فارس شوونیسمینه قارشی جدی مبارزه یه کئچمک لازمدیر. بودور 21 آذرین بیزه قویوب گئتدیگی ارث.

یاشاسین 21 آذرین ارث قویدوغی دموکراتیک پرنسیپ لر