بازگشت به صفحه پیشین

صمد نیکنام

گونئی آذربایجانی ائلچی بئی سیندروموندان قورویاق -

جولای آیی نین ۱۰– اوندا کورشات مرندلی آدلی بیر هموطنیمیز “بای بک” سایتیندا یاییلان “آذربایجان ملی حرکتینده بوتؤولوک آنلاییشی و ملی سیمگه مسئله سی” آدلی یازیسیندا “فکر بابامیز ائلچی بئی” دئیه رک “بوتؤو آذربایجان بیرلیگی”نین (ب.ا.ب)) چاپ ائتدیردیگی “موختصر آذربایجان تاریخی” آدلی کتابا ایستیناد ائدیر و گونئی آذربایجانا بایراق تکلیفینده بولونور.

ائلچی بئیین مبارزه فلسفه سی آذربایجان جمهوریسی اوچون یارارسیز اولدوغو کیمی، گونئی آذربایجان اوچونده یارارسیز و چوخ تهلوکه لیدیر. ائلچی بئیین مبارزه فلسفه سی “آزادلیق قان طلب ائدیر” شعارینا کؤکلنمیشدی. قوزئی آذربایجاندا باش وئرن ۲۰ ژانویه، خوجالی و قاراباغین اشغالی کیمی فلاکتلرین کؤکونده دایانان بو “سیاسی فلسفه ” و اونون اساسیندا یورودولن سییاست ایدی.

۱۹۹۰-اینجی ایل ژانویه آیی نین ۱۹-او ساعات ۳-ده آذربایجان دؤولت تهلوکله سیزلیک کومیته سی نین سدری واقیف هوسئینوو ائلچی بئی و اعتیبار مممدووو چاغیریب دئینده کی، “جاماعاتی کوچه لردن ییغیشدیرین، اوردویا گئجه ساعات ۱۲-ده شهره گیرمک امری وئریلیب” ، ائلچی بئی دئمیشدی “آزادلیق قان طلب ائدیر” و بوندان سونرا خالق جبهه سی نین فعاللاری اوردونون شهره گیره جگیندن خبرسیز اهالی نین، کوچه لره چیخماق پروسئسینی اینتئنسیولشدیردیلر.

 ۲۰ ژانویه فاجعه سی ایله باغلی ۲۰۰۵-اینجی ایلده “تاریخیمیزین فاجعه سی و فاجعه میزین تاریخی” آدلی سلسله یازیلار یازدیم و باکی-دا چیخان اکپرس قزئتینده چاپ اولدو. اورادا خالق جبهه سی و اونون رهبری ائلچیبگین یوروتدویو سیاست اینجله نیب.

   خوجالی فاجعه سی ده، ۲۰ ژانویه فاجعه سی کیمی آذربایجان میلتی نین طالعیینه یازیلمامیشدی و اونون قارشیسینی آلماق اولاردی. خوجالی فاجعه سی نین قارشیسینی آلماق اوچون اعتیبار مممدووون دئدیگی کیمی، هم کفایت قدر سیلاح و هم ده جانلی قوه وار ایدی. آذربایجان حربچیلری تدبیر گؤمک عزمینده ایدیلر و تدبیر ده گؤرولموشدو، لاکین اجرا اولمادی و یاخود قارشیسی آلیندی. نتیجه ده، ارمنی سیلاحلی قوووه لری آرخایینلیقلا دینج اهالینی قیردی و فاجعه باش وئردی.

خوجالینی محاصره دن چیخارتماق و اهالینی خلاص ائتمک تدبیری نین قارشیسینی کیم آلدی و نه اوچون آلدی؟ قیرغینلارین تؤرمه سینه و قیرغینی یاراتماق اوچون دوشمنه فرصت یارادان هانسی سیاست ایدی ؟. بو مسئله لردن خبری اولان کوماندیرلردن، آغداملی ائلدار باکی-دا اؤلدورولدو. آللاهوئردی آغدام-دا مینایا دوشدو، قاتیر ممد آدلانان یعقوب، خسته خانادا اؤلدو. خالق جبهه سینه منسوب اولان فهمین حاجییئو یاشاییر.

بو حاقدا آختاریش آپارماق ایسته ینلره بیر عنوان دا گؤستریرم.

همن واخت آذربایجان خالق جبهه سی نین ایداره هئیتی نین عوضوو، مینگچئویر-ین ایجرا باشچیسی فایق بخشعلیئو، باش ناظر حسن حسنوو-ون تئلئفون دانیشیغیندان ائشیتدیکلرینی قزئتلره دانیشدی. گئدین تاپین اوخویون و آختارین یورودولن سیاستین کؤکونو تاپین.

قاراباغ مسئله سینه گلدیک ده ایسه، بیرینجیسی، خالق جبهه سی و ائلچیبگین یوروتدویو “سیاستین” نتیجه سی بوندان آرتیق اولمازدی، بورادا دئتایللارا وارماق فکرینده دئییلم. ایکینجیسی، ائلچی بئی-ین اؤز دئدیگینه گؤره ، روسیه پرئزیدئنتی بوریس یئلتسین اونا دئمیشدی کی، داغلیق قاراباغ-دا یاشایان ارمنیلرین مختاریتینی قایتارین قوی یاشاسینلار. ائلچی بئی: یوخ اولماز دئمیشدی. ائلچی بئی بو حاقدا سهو ائتدیگینی رادیودان اعتراف ائتدی.

بوتؤو آذربایجان بیرلیگی نین یایدیغی “مختصر آذربایجان تاریخی” کتابی حاقدا اونو دئییم کی :

بیرینجیسی ، بو کتابدا هامی نین شکلی سیرایا دوزولوب او جومله دن ائلچی بئینده شکلی وار. آما پیشه وری نین شکلی یوخدور. گؤره سن ندن بئله دیر؟

ایکینجیسی، آذربایجان تاریخیندن دانیشان بو کتابدا افشارلار سلاله سیندن و بو سلاله نین بانیسی نادر شاهدان دا اثر- علامت یوخدور.

بوندان باشقا، بو کتابدا قاجارلاردان ایران ظلمکارلاری کیمی آد آپاریلیر. کتابین یازیسیندان فرقلی اولاراق، دئمه لییم کی، قاجارلار ایران ظلمکاری دئییل بلکه، آذربایجانین فخر ائده جگی بؤیوک بیر سلاله دیر. فارس شووینیستلری نین ان مرتجع جناحی نین سیاستینی تبلیغ ائدن “بوتؤو آذربایجان بیرلیگی”نین کتابی بو فکرلری ایله، قاجارلاری دئییل بلکه، آذربایجان ملتینی تحقیر ائتمیشدیر.

فارس شووینیستلری نین تبلیغاتیندان فرقلی اولاراق، تاریخ هله قاجارلار سلاله سی نین بانیسی آغا محمد شاه قاجار کیمی داهی و عدالتلی سرکرده یئتیشدیرمه میشدیر. آذربایجان حاکمی ولیعهد عباس میرزه یه فارس ظلمکاری دئین جریان، آذربایجان میلتینه تاریخ یازمیر، بلکه میلتیمیزین تاریخینی ساختالاشدیرماغا جهد ائدیر. بو بیر حقیقتدیر کی، قاجارلار تورک سلاله سیدیر و اونلارین ظلمکارلیق درجه سینی اؤلچمک اوچون بوتؤو آذربایجان بیرلیگینده بیر اؤلچو واحدی یوخدور. مشهور آلمان شاعری برتولت برشتین سؤزو ایله دئسک، “حقیقتی بیلمه یه نلر ناداندیر، اونو بیله رکدن تحریف ائدنلر ایسه آخماقدیر (جینایتکاردیر- بای بک)”.

آدی چکیلن کتابین باشقا مؤضوعلاری دا بئلجه یاراماز و یئترسیزدیر.

بو کتاب حاقدا سونونجو اولاراق اونو دئییم کی، بو کتابا هئچ بیر تاریخچی متخصص رای یازمامیش و اونو تاریخی اثر کیمی تصدیق ائتمه میشدیر. اونا گؤره ده، کتابدا یازیلانلار هئچ بیر علمی اهمیت داشیمیر.

ائلچی بئیین یوروتدویو مبارزه فلسفه سیندن فرقلی اولاراق، گونئی آذربایجان ملی آزادلیق مبارزه سی ملی، مدنی و قانسیز- قاداسیز بیر مبارزه دیر. آذربایجانین چاغداش ملی مبارزه سی مدرن و مدنی خاراکتر داشیییر.

بیزیم آزادلیغیمیز “قان طلب” ائتمیر بلکه، مدنی ملتلرین الده ائتدیگی نایلیتلره یییلنمک، ساوادلانماق، بیر-بیریمیزین فکرینه سایغی ایله یاناشماق، انسانلارین فکرینه حؤرمت ائتمک و بوتون بونلاری تکمیللشدیره رک، ملی دموکراتیا طلب ائدیر. ملتی قان تؤکمکله قورتارماق اولماز. بلکه عکسینه : “کسسه هر کس تؤکولن قان ایزینی - قورتاران داهی اودور یئر اوزونو” . (حسین جاوید) .

آذربایجان اروپانین ترکیب حصه سیدیر. اروپا ملتلری نین آپاردیغی مدنی و دموکراتیک مبارزه قایدالارینی بوتؤو آنلامدا قبول ائده رک، اونو وطنیمیزین کنکرت شرایطینه تطبیق ائتمه لیگیک.

۱۱/۰۷/۲۰۰۸

قایناق: بای بک سایتی

http://www.11008.baybak.com/il_11008_say_448.azr