بازگشت به صفحه پیشین

یدالله کنعانی (نمينلی) دن مکتوب

دموکراتیک 21 آذر بایراغینی آلتیندا ایره لی!

عزيز سيروس !

25 آذر 1387- جی ايلده آذربايجان ملی حکومتين 63- جو ايلی مناسيبتيله چيخيشينين متنينی اوخودم. 21 آذر نهضتينين مضمون و ماهيتی و بو حرکاتين بوگونکو نسله وئره­جی درسلری دولغون  شکيلده و بوتون آچيقليغی ايله اوخوجولارا شرخ ائتدیينه گؤره اؤز تشکورومو بيلديريرم. حقيقتا آذربايجان ملی حرکاتيندا بو چيخيش جسارت طلب ائديردی و او آدديمی دا سيز آئتدينيز.

سيز بو گون بوتون آذربايجان ملی حرکات فعاللارينا بير داها گؤستردينيز کی، 21 آذر حرکاتی بير ملی دموکراتيک حرکات اولاراق مقصدی آذربايجان خالقينی بير ملت کيمی ايرانين سياسی تاريخه حک اتميشدير

دئدی­يی­نيز کيمی بو چيخيشا قارشی چوخلو بدخواهلار تاپيلاجاق. خصوصيله او شخصلر کی، يالنيز احساس اوزه­رينده کؤکلنميشلر، يعنی 63 ايل بو حرکاتدان کئچمه­سينه باخماياراق بير صحيفه­ده اولسون بو حرکات حاقدا بئله اوخوماميش، لاکين گورولتولو سسله ملت و ملی مبارزه­دن دانيشيرلار. من شخصا بو جسارتلی آدديمی­نيزی آلقيشلاييرام. نيه؟ کی، بو مسئله بيزيم ملی حرکاتين نظری طرفيدير. بونو  هامی بيلمه­لی ايدی. بو ايلک آدديمی سيز آتدينيز. اميد ائديرم کی، 21 آذر حاققيندا آپارديغينيز تدقيقاتلار تئزليکله ايش اوزو گؤرسون.

عزيز دوست سيز بوتون دقيقليکله بو يازيدا گؤستريرسينيز کی، بيزم حرکات ماهيتجه ملی، مضمون اعتباريله دموکراتيک ايدی

ملی ايدی اونا گؤره کی، آذربايجان خالقينی بير ملت اولاراق سياسی تاريخين صحيفه­سينه حک ائتدی. دموکراتيک ايدی، اونا گؤره کی، بوتون اجتماعی زمره­لرين حقوقونو قانون چرچيوه­سينده معين ائتدی. بونلار ايدی او حکومتين هدفی.

63 ايل بو حرکاتدان کئچمه­سينه باخماياراق بو نهضتين بوتون اشتراکچيلارينين يازديقلاری و دانيشديقلاريندان آيدين اولور کی، بو حرکات سئپاراتچي بير حرکات دئييلدی. نهضتين رهبری سيد جعفر پيشه­ورينين او دؤورکی بوتون يازيلاريندا بير کلمه­ده اولسون سئپاراتچيليق حاققيندا بئله تاپماق اولماز. بو سببدن منده سيزين سسی­نيزه سس وئره­رک دئييرم بوتون آذربايجان مبارزلری پيشه­وری­نين خاطرلری کی، آذربايجان رئسپوبليکاسينين پارتيا و سياسی، اجتماعی جمعيتلر آرشيوينده اولان اليازماسی اوزوندن لاتين الفباسینا کؤچورولوب و آذربايجان دموکرات فرقه­سی واسطه­سيله کتاب شکلينده نشر ائديلميشدير، اوخوسونلار. اوندا اولان درسلری هامی اؤيرنمه­ليدير.

بو حرکاتا باغلی اولانلار 63 ايلدير کی، دشمنلرين قارا خط­له يازديقلاری "تجزيه طلبلی" يه قارشی چيخيش ائديرلر. نيه؟ کی، ملتين تعيين مقدرات حقوقو يالنيز آيريلماق دئييلدی.

دوغرودور بيز ايراندا بؤيوک بير ملتيک و تاريخی اراضيميزدن ­ده کنارا گئنيش يايلميشيق و بو سببدنده ضياليلاريميز ايراندان سؤز دوشنده او اؤلکه­نی چوخ ملتلی بير اؤلکه حساب ائده­رک او چرچيوه­ده ملی کيمليکدن دانيشير و يازيرلار.

اما سيزين چيخيشی­نيزدا اولان بير مسئله­يه اؤز مناسيبتيمی بيلديرمک ايسته­ييم. ياخشی اولاردی کی، آد چکدی­يينين شخصلرلرين بيزيم نهصت حاققيندا دئديکلری منفی فيکيرلر باره­ده فاکت و سندله چيخيش ائده­ردينيز. البته بيلرم سيز سندسيز بير سؤز دئييب و يا خود يازمازسينيز. اونا گؤره بو چيخيشينيز کی، يازی شکلينده سندلشيب، ايسترديم اونلار باره­ده کی، فاکتلاری اوزه چيخاراسينيز.  

عزيز دوست باشقا بير مسئله­يه ده مناسيبتينی بيلديرمک ايسته­ييرم. آذربايجان ملی حرکاتيندا اولان دوشونجه­لري کی، دؤرد يئره بولموسونوز. منيم فيکريمجه  اوچ خط اوزره­ اولماسی داها دقيقدير.. يعنی 1- آذربايجانچيليق. 2- آذربايجانچيليق بتؤولوک( شمال جنوب بيرلشمه­سی). 3- تورکچولوک و تورانچيليق. آذربايجان ملی حرکاتی بو اوچ خط اوزه­رينده حرکت ائدير.

عزيز دوست سون اولاراق بير داها بو آتديغين جسارتلی آدمی آلقيشلاياراق، بو يولون نه قدر آغير و مسئوليتلی اولماسينی دوشونورم. بيليرم کی، 21 آذرچيلرين آپارديقلاری مبارزه يولو هميشه آغير و مسئوليتلی اولوموشدور. بو بايراق دوشمنلر طرفيندن قينانيب و مینلرله تهمت و افترا ايله قارشيلانميشدير.  اما بو يولون يولچولاری او بايراغی قوروياراق بوگونه­دک گتيريب چاتديرميشلار. بو سببدن من اينانيرام کی، سيزين کيمی انسانلار بو بايراغی گلجه­کده ­ده دالغالانديراجاقلار.

                                                                                                             صاباحين اميدی ايله

                                                                                                              ياشاسين آذربايجان

                                                                                                              ياشاسين 21 آذر حرکاتی   

        حرمتله يدالله کنعانی (نمينلی)