|
||||||
|
حسن ايلديريم وطنداشليق اؤلچوسو بو دونيادا ائله اينسانلار ياشاييرکي، هله ساغايکن اسطورهيه چئوريليرلر، ناغيلا دؤنورلر. بئله نادر اينسانلاردان بيريده آذربايجانين قارتال باخيشلي، ساوالان ووقارلي، سهند ايرادهلي دؤنمز و يئنيلمز ايگيد اوغلو "صفرخان" دير. بيز هله اوشاقايکن اونون حاقيندا افسانهلر ائشيتميش و اونو گؤرمک ٱرزوسويلا ياشاميشديق. آنجاق گون گلدي کي اونو ياخيندان گؤروب و هم صحبت اولماق سعادتي بيزهده نصيب اولدو. گؤروشلريميز آرتديقجا، اونونلا دوستلاشديقجا، او بير داها گؤزلريميزده بؤيودو، اوجاليغي بيزيم اوچون ال چاتماز اولدو. صفرخان ائله بير اينسانايدي کي اونون ظاهري گؤرکميله معنوي دونياسي آراسيندا بير باغليليق و دوغماليق وارايدي. شخصيتيايله فيزيکي و جيسماني سيماسي بير- بيريني تاماملاييردي. او اوجا بويلو، دولو، ائنلي کورهکلي، ايتي باخيشلي، پولاد چنهلي، آچيق آلينلي و گؤرکملي بير کيشيايدي. بو گؤرکم سانکي اوندا اولان معنوي تميزليگين، جسارتين، غئيرت و ايگيدليگين، دؤزوم و تميزليگين، مهربانليق و صداقتين گؤرکميايدي. او بو گؤزلليگي، بو ايگيدليک و اوجاليغي اؤز دوغما خالقينين مبارزهسينه قوشولاراق و چتين سيناقلاردان کئچهرک ، وطن اوغوللارينين ان بؤيوک اياقدا گؤسترديکلري رشادتلر و شهامتلرله يوغرولدوب و خالقين جسارتلي، بيليکلي و عاغيللي اوغوللارينين تحربهلريله بزهميش و اونلارلا چييين- چييينه آغير و عذابلي ايشکنجهلي زيندان ايللريني کئچيرهرک، اؤيرهنه- اؤيرهنه، اؤيرهده- اؤيرهده دايانميش، ديرنميش و برکيميشدير. گنج نسلين سيرداشينا، صبيرداشينا چئوريلميشدير. زيندانلاردا، قارا گونلرده اورهييني مشعل کيمي يانديراراق مبارزه يوللاريني ايشيقلانديرميشدير. اونون زيندانسيز گونلري يئنهده دوستلارسيز و خالقسيز اولماميشدير. محاربه ايللري، آغريلي، آجيلي، هيجرانلي گونلر اونون اورهييندن يول سالا- سالا، اونون باغريني پارچالايا- پارچالايا کئچميشدير. آنجاق يئنهده بير اوجاق کيمي سويوق اللري، اوميدسيز اورهکلري قيزينديرميشدير. اونلارا ياشاماق، سئومک و اينسانليق عشقي آشيلاميشدير. "خان"ين اوميد دولو، آرزو دولو، حسرت ناخيشلي، انتظارلي باخيشلاري جانينا ساريليب، سنده بير داها آرزولاري، صاباحلاري، آيدين اوفوقلره قانادلانديرير، اونون دوداقلاريندان سوزولن بال کيمي شيرين و خئيرخواه ايستکلره بلنميش سؤزلر، اورهيينه آخا- آخا سني گونلر بويو، آيلار اوزونو حياتين معناسي حاقدا دوشوندوره- دوشوندوره ياشاتميشدير. اوميد وئريجي ايري اللري، اللريني سيخاراق، اؤز اورهيينين حرارتيني سنه باغيشلاياراق، سندهده سئومک و سئويلمک عزمي اوياتميشدير و اورهيينين چيرپينتيلارينا قوشولموشدور. اونون دوروشو و داورانيشي، اوميدين، دؤنمزليگين و سؤنمزليگين جانلي هئيکليايدي ايندي اونلار خاطيرهلره دونوب، مينلرله اينسانين اورهيينده ياشايير. صفرخان جيسمن دونياسين دييشيبسهده، روحن خالقيميزين تاريخي يادداشيندا حک اولونوب، خالقين روحونا قوشولوب روحو. خالقيميز وارکن، دونيادا عدالت و آزادليق وارسا، اينسان لياقتيني اوجا توتماق وارسا، دئمک دونيا دورورسا، صفرخانين آديدا قالاجاقدير. اودور کي دئييريک: صفرخان اؤلمزدير! شاعر دئميشکن: "اونودولماز ائل يولوندا جاني قوربان اولانلار." صفرخان اؤز شرفلي عؤمرونو خالقيميزين، اينسانليغين سعادتي و آزادليغي اوغروندا صرف ائتدي. او عادي بير کندليدن بؤيوک بير قهرمان سويهسينه اوجالدي. اونو اوجالدان، اوندا اينام، عقيده و اينسانليق سئوگيسي اولموشدور. صفرخان آرتيق خالقين آرزوسونون تمثيلچيسي، دؤزومونون سيمبولودور. او اؤزو وطنداشليق اؤلچوسودور بيز بو ايگيدليک، وطنپرورليک، اينسان سئورليک تمثالينين، اؤلمزليک و ابدي ياشارليغي اؤنونده باش ايير و اؤز اورهک سؤزلريميزي بير ادبيات چلنگي کيمي اونون بؤيوک روحونا هديه ائديريک! |
||||||
|
"آذربایجان"
دا
یازیلان مطلب لردن
باشفا سایت لار ویایینلاردا
فایدالانماق، |
||||||
