نسخه قابل چاپ

احد واحدی

"ارمنی سوی قیریمی نین انکاری فرانسه ده جزالاناجاق"

 فرانسه ملی مجلسی، اوپوزیسیوندا اولان سوسیالیست حزبی طرفیندن وئریلن و ارمنی سوی قیریمی ادعالارینین انکارینین بیر ایل زندان و 45 مین اویرو پول جزاسیله جزالاندیرماسی لایحه سی، 19 مخالف و 106 موافق سسله قبول ائتدی.
فرانسه ملی مجلسی نین 577 عضوو واردیر. بئله لیگله عضولرین 18 فاییزی بو قراره موافق سس وئریبلر. اقتداردا اولان حزبین 364 ملت وکیلی ندن یددی ده بیریندن آزی (49 رای)، مخالفتده اولان و تکلیفین صاحبی سوسیالیست پارتیاسینین 150 ملت وکیلی نین دورتده بیریندن بیرآز چوخو (40 رای) بو قراره "بلی" دئمیشلر.
لایحه نین قانونلاشماسی اوچون سنا مجلسیندن کئچمه سی گرکدیر. لایحه سنا طرفیندن قبول اولورسا، امضاء اوچون پریزیدنته (ژاک شیراکا) گؤنده ریله جک. پریزیدنت 15 گون ایچینده متنی ایکینجی دفعه مذاکره اوچون مجلسه اعاده ائتمه سی ممکن دور. (شیراک بو حقدن استفاده ائدیب و یا ائتمه مه سی بللی دگیل!) حتی بو پروسه یئرینه یئتسه ده، "دوشونجه و بیان آزادلیغینین پوزولماسی" تفسیریله، یئنی پریزیدنت (2007 نجی ایلین بهاریندا فرانسه ده پریزیدنت سئچکی سی اولاجاقدیر!)، باش ناظر، سنا و ملی مجلس لرین ریاست هیئتینین عضولری، 60 ملت وکیلی و یا سناتوربو لایحه نین آنایاسایا مخالف و یا متضاد اولدوغو سبب لریله، اونو سون تصمیم اوچون آنایاسا محکمه سینه گؤندرمه گه قادردیرلر.
عین حالدا، ترکیه، موضوعو آوروپا انسان حقلری کمیته سینه آپاریب و بو لایحه نی "انسان حقلری کنوانسیون" لارینین قرارلاری محتواسینا ضد اولدوغو اوچون، فرانسه نین علیهینه دعوا آچابیلر.
بو قرایله علاقه دار، مخالفت گونی گوندن آرتماقدادیر؛ اونلارین بعض سینه  اشاره اولونور:
آوروپا بیرلیگی کومیسیونون گئنیشله مه مسئول عضوو "اولی رن" ین طرفیندن وئریلن آچیقلامادا، دئییلدی کی، اگر بو لایحه قانونلاشیرسا، سون ایللرده ترکیه ده بوساحه ده آچیلماقدا اولان بحث چرچیوه سی اوزه رینده منفی تاثیرلر بوراخاجاقدیر.
"تاریخ اوچون آزادلیق جمعیتی"  نین عضوو، فرانسه تاریخچی سی، پی یر نورا، بو قانونو"فلاکت" کیمی تفسیر ائدیب و حاضرلادیغی بیلدیریشی پریزیدنت
ژاک شیراکا وئره رک، "قانونون ابطالینی" ایسته میشدیر. دئمک لازمدیر کی همان بوپی یر نورا، ترکیه نین آوروپا بیرلیگینه گیرمه سینه، کسینلیکله قارشی دیر.
نوبلی قازاندیقدان سونرا، فرانسه ملی مجلسینین قراریله ایلگی لی سئواللاری جوابسیزقویان اورهان پاموک، ایلک دفعه بو ساحه ده حریت ایله دانیشدی. پاموک قراری "دوشونجه آزادلیغی اوچون هیچ ده خوش اولمایان، فرانسه کولتورونه یاراشمایان بیر حادثه"  کیمی توصیف ائتدی. او بئله سؤیله دی: "بیر فرانسه عادت و عنعنه سی واردیر، آزادلیق چیلیق، "زولا" دان "سارتر"ه قدر بیر عنعنه دیر بو. آزادلیق اوچون مقاومت گؤسترن یازیچی لاردیر بونلار و بؤیوک فرانسه عنعنه لرینین ان اؤنملی نماینده لریدیر. پارلمان دان کئچن سون یاساقلانما، بو سؤزونو چکدیگیم آزادلیق عنعنه سینه و بؤیوک فرانسه کولتورونه هیچ یاراشمامیشدیر. دوشونجه آزادلیغی اوچون هچ ده خوش اولمایان بیر حادثه دیر".